(ОР РНБ, Пог. 930, л. 27-49об)

(л. 27) Месяца июня во 12 день явление пречестнаго и чюдотворнаго образа Пресвятые Богородицы честнаго и славнаго Ея Одигитрия, иже есть на Костроме в новой пустыни на реце  Песошне, а сия чюдеса свидетелствовал преосвященный Варлам митрополит Ростовский и Ярославский.

Ныне обратимся паки братие, и восплачемся пред Господем сотворшим нас, и возопием Ему сокрушеным сердцем, и исповедаем согрешения наша, безаконновахом, неоправдихомся пред Тобою; понеже повеления Твоя преступихом, понеже заповеди Твоя презрехом, понеже забыхом оправдания и судьбы Твоя, понеже вослед вожделения и помышлений наших ходихом недостойне. По имени нашем и обетовании пожихом, понеже милосердие Твое затворихом, (л. 27об) понеже человеколюбие Твое спрятахом безаконными злобами нашими, имиже возрастихом; но не предаждь нас до конца, имене Его ради, ниже разори завета Твоего, ниже остави милости Твоея от нас, щедрот ради Твоих и милосердия Твоего ради и Благаго Отца, благости ради и милости Святаго Твоего Духа. Помяни, Господи, многия щедроты Твоя, помяни от века многая чюдеса Твоя, и не помяни наших беззаконий первых, но немощи наша и страдания помяни; призри с небесе и виждь, и посети нас, вино­града сего наследие Твое, и исправи егоже насади десница Твоя, и даруй нам мир, Подателю Господи мира Благий, честныя ради и святыя Крове Твоея, от неяже оживотихомся и спасения ради мира сего излиял еси. И даруй Пречистыя ради (л. 28) Твоея Матере, Еже есть общее великое Упование, и общее Заступление, и Ходатаица нам всем, и Крестителя ради Твоего Иоанна Предтечи, и святых ради апостол и святых ради мученик, иже имене Твоего ради крови пролиявших, и святых ради пророк Твоих, и святых ради отец и патриарх и учителей, и угодити Тебе, и Твоему Милосердому Отцу, и Утешителю и Святому Твоему Духу; не на оправдания бо наша уповаем, но на милость и щедротыТвоя, понеже бо иного кроме Тебе не вемы, имя Твое нарицаем, и от Тебе ищем помощи. Како исповедати нам прегрешения своя к Богу, и к Тому прибегаем и уповати на милосердие Его неизреченное и милости, подаст и воскресит нас от греха, и сохранит нас от всякого гнева и нужды и пленения и скорби. Обаче воз(л. 28об)вратимся на предлежащую повесть; сия нам содеяся праведным судом Божиим, бысть же сице: В лето 7079 при державе благовернаго царя и великаго князя Иоанна Васильевича всея Росии; и при его благородных царевичах Иоанне и Феодоре и при святейшем митрополите Дионисии, и в то время належащу велию мору по многим градом и по селом и многи грады и веси Росийскаго государьства; и многия грады и веси велиим запустением запустеша. Достиже же и до пресловущаго града Костромы, и многия окрестныя веси града того без остатку запустеша, и вместо богонасажденаго винограда, по образу Божию созданаго человека, дивия дубравы возрастоша; и многия обители и святыя и священыя церкви запустеша. Темже оставльше (л. 29) начало словесе, на совершение известити желаем вашему боголюбию, понеже вашу любовь зрю, якоже некая плодовитая земля семена приемлет, ово сто, ово шестьдесят. Да коснемся иже о сих беседе, елико подаст Дух Святый, прежде похваливше ваше усердие теплое; толико бо к Церкви ваше тщание, елико чадом к матери, елико жаждущему ко источнику, елико кораблю ко пристанищу; толико и нас велит преспевание ваше яко ныне яви нам о сем Милосердый Господь Бог наш Своея ради неизреченныя благодати в сие последнее время. В лета 7132, при державе благовернаго царя и великаго князя Михаила Феодоровича всея Росии, и при Святейшем патриархе кир Филарете Московском и всеа Росии; показа нам пра(л. 29об)ведное и пресветлое солнце, и отверзе породу Едема затвореннаго, яви пресветлую икону, звезду небесную, источник неисчерпаемый, Своим человеколюбием и смотрением, в прежде запустевших дивиих дубравах сокрываему, чюдную икону Матере Своея, и нашея Владычицы Богородицы и Присно Девы Марии, честнаго и славнаго Ея Одигитрия, и Свой человеколюбивый образ. Яви убо сицевым образом Свое честное сокровище, источник неизчерпаемый жаждущим, и приходящим с верою, чюдный Свой образ. От предел убо града Костромы, веси нарицаемыя Савинска, сын болярьский именем Емелиан Иоаннов сын, по прослытию Севрюк. Сему убо Емелияну по некоей вине случися ему слепота очима, и страда убо тою боле пять лет, и много своего имения врачем (л. 30) разда, и никакоже пользы обрете, но паче в горшая прииде, и не виде ничтоже. И в некое время отроцы сего Емелияна пасяху овцы и ослята, и случися им пасти в некоей пустыни, ей же имя Игрища, на речце Песошне, и видяху бо в той пустыни церковь зело престаревшуся, яко близ разрушения, еже и углом распадшимся, церковь же та во имя Николы чюдотворца; пришедшим же им во священую и святую церковь помолитися, яко есть обычай православным христианом молитися, и се абие узреша чюдотворный Пречистыя Богородицы образ с Превечным Младенцем Господем нашим Иисусом Христом, удивишася зело, глаголюще: како убо церковь зело престаревшися, образ же Пресвятыя Богородицы, яко ново написан; отшедшым же им во своя си, и вся по ряду яже видяху и поведаша
(л. 30об) господину своему: яко видехом мы, господине наю, преславная днесь в оной сице пустыни и имя нарекше, церковь убо, господине, зело престарелася, образ же в ней Пресвятыя Богородицы на престоле стоящь яко ново написан. Слышав же сие предиреченный муж Емелиян от рабов своих таковыя преславныя глаголы, слез убо и радости исполнися, яко обретоша безценное сокровище, воистинну убо безценное, емуже и всего мира богатство не довлеет. Вскоре убо посылает от рабов своих в пресловущий град Кострому по духовнаго отца своего священно иерея Феодора, соборныя церкви Пресвятыя Живоначалныя Троицы, и молит убо его, дабы пришел  на то преславное видение, и взял бы с собою вся яже на совершение молебнаго пения. (л. 31) Послушлив убо бывает духовный той отец к сыну своему, и вскоре приходит по умолению его, и вся восприемлет потребная ему, еже есть на совершение молебнаго пения, вкупе же той предиреченный муж Емилиан емлет с собою ближных и сосед, и молит, дабы пошли с ним на преславное то видение, и совершили бы о нем ко Пресвятей Богородице молебное пение. Они же слышавше от него таковая, послушливи ему бывают, вкупе же и радости исполнишася; и абие убо приходят в предиреченную пустыню, и видевше всю истинну яже слышавше от предиреченных отрок, и вси воздаша славу Господу Богу, и Пречистей Его Матери, яко таковая преславная видехом, и начаша пети молебная пред чудотворным образом Пресвятыя Владычицы нашея Богородицы. (л. 31об) Егда же убо прииде время кропити святою водою. Оле преславное чудо! Кропя убо и той предиреченный иерей Феодор чудотворный образ Пресвятыя Владычицы нашея Богородицы, и абие та святая вода во святую чюдотворную икону яко в губу вхождаше; на очию же пречистаго и чюдотворнаго образа Владычицы нашея Богородицы святая та вода на долг час стояше, помалу жь времени потекше та святая вода от очию яко струя. О преславное и неизреченное милосердие Владычицы нашея Богородицы и Присно Девы Марии! Яве есть, яко источник чюдес дарует от пречестнаго и чудотворнаго Своего образа Одигитрия приходящым к нему с верою. Священник же взем святую воду, и покропи слепаго, он же не погреши надежди своего спасения, но вскоре (л. 32) получи своима очима исцеление, и прозре светло яко никогдаже боле очима своима. Видевше же сия преславныа чюдеса Пресвятыя Владычицы нашея Богородицы от чюдотворнаго Ея образа, священник Феодор и прочии клеврети их, темже и мы воздаша славу и хвалу Господу Богу и Пречистей Владычице нашей Богородице, от’идоша восвояси радующеся, исповедаша сия преславная чудеса Владычицы нашея Богородицы, и о чюдотворном Ея образе, яков бе светел яко днесь написан, и о прекрасном том месте, во граде Костроме и во всех пределех его. Слышавше же сия преславная чудеса православнии и благочестивии народи града Костромы, радости духовныя исполнишася.

Приспевшу же празднику Пресвятыя (л. 32об) Владычицы нашея Богородицы, Положение ризы, тогда убо готовляхуся благочестивии народи на пошествие в новопросвещенную [1] пустыню, и потекоша с великим тщанием, не токмо от града Костромы, но и ото всех предел его мужие и жены и дети. И всяк возраст друг друга понуждаху на преславное видение, не токмо слышати хотяще, но и видети пречюдный образ Пречистыя Богородицы, имяху бо благочестивии народи веру велию, в новопросвещенную пустыню к чюдотворному образу Пресвятыя Владычицы нашея Богородицы, и великому чюдотворцу Николе, и прихождаху на вся праздники от многих весей не токмо з женами и з детми, но и ссущими младенцы, тамо многия пения совершаху, в нихже бе и нарочитые мужи, (л. 33) о нихже последи скажем, и кождо их своего прошения но вся яже на пользу своего прошения. Мало жь народу отшедшу и ставшим тамо на некоем месте прекрасном, и зрящим к пречистому и чюдотворному образу Пресвятыя Владычицы нашея Богородицы, и на святую церковь молящеся, и многи слезы проливающе, и глаголюще сице: о Пречистая Владычице Богородице, прослави   имя Твое святое на сем месте. Не по мнозе же времени молитвою Пресвятыя Владычицы нашея Богородицы обитель бысть. Не бе бо еще живущих в новопросвещенной обители сей. И возвращахуся кождо восвояси, и радующеся, славяще и благодаряще Бога и Спаса нашего Иисуса Христа, яко сподоби нас такова безценнаго дара. Такожде славяще и благодаряще Пресвятую Владычицу нашу Бого(л. 33об)родицу яко сподоби нас видети Свой пречистый и чюдотворный образ, яко посети нас Своим неизреченным светом, благодатию и человеколюбием Господа Бога и Спаса нашего Иисуса Христа, Ему же слава ныне и присно и во веки веков, аминь.

О пришествии в пустыню четырех человек и о зачале манастыря

Слышавше же сия преславная чудеса Пресвятыя Владычицы нашея Богородицы и Приснодевы Марии, бываемыя от пречистаго Ея образа в новопросвещенной пустыни, благочестивии мужие от пресловущаго града Костромы, имже имена: Потапий и Григорий, Карп и Андрей; оставляют вся своя домы и жены и чада, ревнующе древним богоносным отцем, яко убо они древния отцы, иже прежде закона божествении мужи, не писмены (л. 34) или словесы учими бяху, но чисто имуще сердце, духовным осиянием просвещахуся; такоже и сия благочестивии мужи подражатели быша тем древним святым отцем. Приходя убо в новопросвещенную сию пустыню, не во едино убо время, ни во един день, но един по единому в мале времени собрашася, и мало убо потрудишася еще в мирстем образе, не бе бо еще в пустыни той иноческаго чина и священническаго. Аще бо и молебная пения у чюдотворнаго и пречистаго образа Пресвятыя Владычицы нашея Богородицы совершаху, но обаче от града Костромы и от иных весей священницы прихождаху службы совершающе, и паки во свояси отхождаху. По некоем же времени призывают убо некоего инока имеюща священнический чин, и постризают власы глав своих, вкупе же и всех мирских, и паки начаша болми тру(л. 34об)ды к трудом прилагати. Аминь.

Чюдо Пресвятыя Богородицы о недостатце пищи

По некоем убо времени не доставши пищи, не имеюще бо чесо предложити на снедение, и хотяху изыти до некия веси дабы купили в снедь потребная им, и изыдоша до дороги близ убо предлежит путь пустыни тоя, и абие милостию Божиею и Пречистыя Богородицы милосердием обретоша на пути три хлебы на некоем древе, на тобже бе древе воображен Животворящий Крест. Прияша убо хлебы, и возвратишася паки в пустыню, благодаряще Господа Бога, и Пречистую Его Матерь Пресвятую Владычицу нашу Богородицу, яко не остави раб Своих терпящих в пустыни сей имени Своего ради, и паки начаша труды ко трудом прилагати. Слышавше же благочестивии народи града Костромы, и вси иже (л. 35) окрест живущии, яко уже и мниси селитву имут в новопросвещенной пустыни, и начаша наипаче веру велию и любовь стяжати, и приходити во святую пустыню, совершающе молебная пения у чюдотворнаго образа Пресвятыя Богородицы Владычицы нашей и Приснодевы Марии. И многия оставиша домы и родители своя, жены же и чада, и быша иноки, и абие милостию Божиею и благодатию и Пресвятыя Богородицы Владычицы нашея, нача то святое место распространятися.

О знамении святем места того

Поведаша нам нецыи христолюбцы глаголюще: некогда шествующима в мимошедшем времени близ пустыни сея; и слышахом звон велий, и мнеша яко звон той у Святыя и Живоначальныя Троицы Ипацкаго монастыря; и приидох убо во обитель Пресвятыя и Живоначалныя Троицы Ипацкаго монастыря, и абие (л. 35об) начаша у Пресвятыя Живоначалныя Троицы к заутрени благовестити. Мы же убо о сем зело удивишася, откуду убо нам в пустыни сей толикий звон слышавше, и глаголаху: яко быти некоему преславному знамению в пустыни сей, не по мнозе же времени еже и бысть.

Чюдо Пресвятыя Богородицы о некоей жене, егда начаша созидати святую церковь

Тогда убо приидоша множество народа от града Костромы, и предел его, в новопросвещенную обитель к чюдотворному образу Пресвятыя Владычицы нашея Богородицы, вкупе же прииде с ними и жена некая именем Пелагия, одержима лютою болезнею глухотою; егда же начаша пети молебен Господу Богу, и Пречистей Его Матери, и великому чюдотворцу Николе о создании святей церкви; тогда убо сия предиреченная она жена Пелагия (л. 36) припаде с теплою верою, и со слезами к чюдотворному образу Пресвятыя Богородицы Владычицы нашея, и великому чюдотворцу Николе, просяще прощения своих согрешений, вкупе же о исцелении; и никакоже погреши своего спасения, но вскоре получи своима ушима слышание, и нача ясно слышати, яко ни весма поболе, и от’иде в дом свой радую­щеся славяще и благодаряще Бога и Пречистую Его Матерь Владычицу нашу Богородицу, и великаго чюдотворцу Николу.

Чюдо Пресвятыя Богородицы о швеце некоем именем Павле

Во ино же время приведоша некоего человека от града Костромы именем Павла, бе же той Павел ремеством швец, случижеся убо ему по некоей вине ума изступити, еже не знаяше, многажды и сам себе не знаяше и хотяше себе погубити лютою смертию. Слышавше же родители его и ближнии друзи преславная (л. 36об) чюдеса бываемая в новопросвещенной пустыни от пречистаго и чюдотворнаго образа, и абие притекоша с теплою верою в новопросвещенную обитель, вкупе же поимше с собою предиреченнаго Павла. Припадают убо со слезами пред чюдотворною иконою Владычицы нашея Богородица, и великаго чюдотворца Николы, просяще прощения о своих согрешении, вкупе же и о суседе своем Павле, о исцелении его; и никакоже надежды погреши, но милостию Божиею и Пречистыя Его Матере Пресвятыя Владычицы нашея Богородицы, и великого чюдотворца Николы другу своему Павлу вскоре исцеление дарова; отъидоша в домы своя радующеся, славяще и благодаряще Господа Бога и Спаса нашего Иисуса Христа, и Пречистую Его Матерь, и великаго чюдотворца Николы; радостно воспоминающе истинное и неложное апостольское слово якоже рече: братие, молитеся (л. 37) друг о друзе яко да исцелеете.

Чюдо Пресвятыя Богородицы о некоем человеке Иоанне

Человек некий именем Иоанн, земледелец сый деревни Теплюковы, той убо Иоанн одержим бе сицевою болезнию: два убо лета велми страдаша болячки, и не точию же единема тема, но и рукама не владеяше. И абие приходит во обитель Пречистыя Богородицы честнаго и славнаго Ея Одигитрия, и великаго чюдотворца Николы иже есть пореклом на Игрищах, и обещавается восприяти иноческий образ, и ту с сущими иноки терпети. И отпев молебная Пресвятей Владычице Богородице и великому чюдотворцу Николе, и от лютыя тоя болезни милостию Пречистыя Владычицы Богородицы и молением великаго чюдотворца Николы здравие получи. Ненавидяй же диявол добра роду человечю, вложи ему в сердце сицевое непотребное слово (л. 37об) и душевредное дело, яко да идет в дом свой, и еще неколико лет поживет со женою и детьми. И абие иде в дом свой радуяся, и мало время пребысть в дому своем, и лютейши перваго в предиреченную болезнь впаде; и мало время проводи, и воспомяну согрешение свое, купно же и обещание, и абие паки приходит в пречистую обитель Пресвятыя Владычицы нашея Богородицы, просяще прощения о своих согрешении, и остризает власы главы своея, купно же со от’ятием и всех мирских вещей, и пев молебная Пресвятей Богородице Владычицы нашея, и великому чюдотворцу Николе, и милостию Пресвятыя Владычицы нашея Богородицы, и молением великаго святителя и чюдотворца Николы и совершенно исцеление получи, славя и благодаря Бога, и Пречистую Его Матерь Владычицу нашу Богородицу, и великого чюдотворца Николу.

(л. 38) Чюдо Пресвятыя Богородицы о некоем человеце Иоаникие болящем главою

Человек некий именем Иоанн Александров, чином убо подьячей тогож града Костромы, случися убо тому Иоанну в тяжкую болезнь главную пасти иже наричют ея лом, и от тоя зельныя болезни глава ему распухла, и во очесех свет помрачися, и сна нимало приимаше. Той убо Иоанн мнев, яко по прилучию случися ему естественая немощь, якоже и множицею случается человеком; и на первой недели Великаго поста в четверток, восхотеся ему вина пити, мнев убо поне малу отраду тем от болезни тоя получити; испившу же ему, и абие порази его некая сила, и лежа без памети еле жив; и егда убо прииде в себе, воспомяну своя согрешения, оставляет вся и обещавается по монастырем и по чюдо(л. 38об)творным местом ходити; и многи убо монастыри и чюдотворныя места объшед, восхоте убо ити во пресловущий град Кострому, да и тамо поклонится во святых местех. И егда бысть близ Пречистыя Богородицы обители, вопрошает убо клевретов своих о святем месте сем. Они же ему возвещают, яко сие место новая пустыня, икона же ту Пречистыя Богородицы чюдотворный образ. Он же повелевает вести себе во пречистую обитель. И абие приходит к чюдотворному образу Пречистыя Богородицы, прося и припадая со слезами прощения о своих согрешении, и молебная пев Пресвятей Владычице нашей Богородицы, и великому чюдотворцу Николе, потом же начат святую и Божественную литоргию слушати; и егда нача священник чести Святое Евангелие, и в том часе Пресвятая Владычица (л. 39) наша Богородица от пречистаго чюдотворнаго Своего образа исцеление и прозрение ему дарова, и бысть весь здрав, славя и благодаря Господа Бога и Спаса нашего Иисуса Христа, и Пречистую Его Матерь, Владычицу нашу Богородицу, и святаго великаго святителя Николу чюдотворца. Бе бо в той день случися праздник и торжество торжествам, пресветлое Воскресение Господа Бога и Спаса нашего Иисуса Христа. Той же убо предиреченный муж Иоанн потруждався в пречистей обители Пресвятыя Владычицы нашея Богородицы доволно время, славя и благодаря Господа Бога и Спаса нашего Иисуса Христа, и Пречистую Его Богоматерь, и великого святителя Николу.

Чюдо Пресвятыя Богородицы

Инок некий именем Калистрат, тоя же честныя обители. Случися убо тому Калистрату впасти (л. 39об) в тяшкую болезнь, заняся убо ему водный проход; и от тоя болезни приближися к смерти. Приспевшу празднику великого чюдотворца Николы, ста убо той предиреченный Калистрат на обычном своем правиле, якоже обычей иноком, и мало некако воздрема, и виде к себе пришедша светоносна мужа, сединами яко волнами украшена, и глаголюща к нему: по что, рече, не отпоеши молебная Пресвятей Богородице, и великому чюдотворцу Николе? Он же возбнув, и скоро притек к чюдотворному образу Пречистыя Владычицы нашея Богородицы и Присно Девы Марии, и пев молебная Пресвятей Богородице и великому чюдотворцу Николе, исцеление получи, славя Господа Бога и Пречистую Его Матерь.

Чюдо Пресвятыя Богородицы о человеке Фаддее

Человек некий, именем Фаддей, (л. 40) земледелец сый, от веси нарицаемыя Пушканка, близ убо пречистыя обители Пресвятыя Богородицы яко два поприща; сей убо Фаддей весь разслаблен, и никакоже владея рукама и ногама, пребысть же в тяжкой той болезни пол года; и повелевает себе вести во обитель, и тамо изцеление получи.

Чюдо Пресвятыя Богородицы о некоем человеке именем Зиновии

Человек некий именем Зиновий, Чюдова монастыря крестьянин от веси некия нарицаемыя Мискаго погоста. Сему убо Зиновию случися такова болезнь тяжкая, и в руках зельная щепота, и ина некая внутреняя немощь; и повеле себе вести во святую и пречистую обитель Пресвятыя Богородицы. И приведоша его и внесоша наполсти во святую церковь, и певше молебная Пресвятей Богородице Владычице нашей и великому чюдотворцу Николе, (л. 40об) исцеление получи, и от’иде в дом свой радуяся, славя Господа Бога и Спаса нашего Иисуса Христа, и Пречистую Его Матерь Владычицу нашу Богородицу, и великого святителя Николу.

Чюдо Пресвятыя Богородицы о девице Гликерии

Девица некая именем Гликерия от града Костромы, отца имущи именем Аггея. Сия убо Гликерия одержима бе лютою болезнию юже наричют черную, не точию же та едина лютая немощь, но еще иногда руки и ноги скорчеваше; пребысть же в зелной той болезни полчетверта лета; призывает убо и молит родителей своих, дабы ю отвезли в пречистую обитель Пречистыя Богородицы. Бывает убо послушлив отец дщери своея, приведе ю в пречистую обитель и припадает к чюдотворному образу Владычицы нашея Богородицы и молит о отпущении своих согрешений (л. 41) о исцелении дщери своея; и пев молебная Пресвятей Богородице и великому чюдотворцу Николе, и никожь надежы погреши, но милостию Владычицы нашея Богородицы и молением великаго чюдотворца Николы вскоре исцеление получи, и отойде в дом свой радуяся, славя Господа Бога и Спаса нашего Иисуса Христа, и Пречистую Его Матерь Пресвятую Владычицу нашу Богородицу,  и великаго чюдотворца Николу.

Чюдо Пресвятыя Богородицы о человеке некоем Василии

Человек некий от предел костромских, от веси нарицаемыя Высокого Стану, деревни Погорелки, именем Василий, земледелец сый. Сей убо Василий пришед в пречистую обитель Пресвятыя Владычицы нашея Богородицы и поведа сам о себе глаголя: аз, рече, впаде в таковую болезнь тяжку, яко мнети ми дошедшу до врат (л. 41об) смертных, болезнь же ми сицева бе: пол главы моея вельми боляше, и рамо правое, и рука, и на шеи струп великий, и от толикия зельныя болезни яко забытися ми на мал час, и абие в том часе слышах глас глаголющ ко мне: человече, что страждеши боля? Обещайся, рече, итти в новую пустыню, в пречистую обитель ко Пречистей Богородице, и у Ея пречистаго и чюдотворнаго образа отпой молебен; и аще не имаши что дати, и ты обещайся в пречистей обители потруждатися, и до конца здравие получиши. Аз же от того часа опамятовахся, и зрех семо и овамо, и никогоже видех, и веру ят гласу тому, якоже от Господа Бога сие извещение бысть, и обещахся дойти до пречистыя обители, и тамо молебен отпети Пречистей Богоро: и ту с сущими потружда(л. 42)тися; и абие ощутихся и во здравие пришед, идох до пречистыя обители, и тамо пев молебная Пречистей Богородицы и великому чюдотворцу Николе, и милостию Владычицы нашея Богородицы, и молением великого чюдотворца Николы и совершеное здравие получих,  и ту потруждахся с сущими отцы в пречистей обители; и от’идох в дом свой, радуяся и благодаря Господа Бога и Спаса нашего Иисуса Христа, и Пречистую Его Матерь Владычицу нашу Богородицу и Присно Деву Марию, и великого святителя Николу чюдотворца.

Чюдо Пресвятыя Богородицы о жене Марии

Жена некая именем Мария, от веси нарицаемы Малышковы. Сия убо Мария пришедше во святую обитель Пресвятыя Владычицы  Богородицы, честнаго и славнаго Ея (л. 42об) Одигитрия, и сама о себе поведа нам глаголя: аз рече, глаголю, впадши ми в болезнь тяжку зело, и в той болезни волокло ми руки и ноги вместо, и не точию то едино, но и на главе болезнь была люта зело, и в той зелной болезни страдавшу ми безпрестани целое время зимное, и уже приближися до смерти, и бывшу ми в забытии ума. Оле преславное и дивное и неизреченное чюдо Господа Бога и Спаса нашего Иисуса Христа, и Пречистыя Его Матере Владычицы нашея Богородицы милосердием, яко тако убо не оставляет, но посещает и снабдевает, и милует раб Своих. И абие явимися Пресвятая Богородица Владычица наша и Госпожа сице: мнети ся яко спящи, и рече ми: о жено, что толико время в сицевой болезни пребываеши (л. 43) стражда. Обещайся убо итти в пречистую Мою обитель, в новую пустыню зовомую Игрища, и у чюдотворнаго Моего образа отпой молебен, и свещу постави. Аз убо возбнув от сна и начах молитися Пресвятей и Пречистей Владычице нашей Богородице, и обещахъся итти в пречистую и святую обитель, в новую пустыню иже зовомую Игрища, и у чюдотворнаго и пречистаго Ея образа молебная совершив и свещу поставити. О дивное чюдо, яко в той час всю здраву себе ощути; и прийдох убо в пречистую обитель Пречистыя Богородицы и Присно Девы Марии, и великого святителя чюдотворца Николы, и пев молебная у чюдотворнаго и пречистаго Ея образа, и великому чюдотворцу Николе, и совершеное здравие получи, и возвратися в дом свой радуяся и славя Господа Бога, и Пречистую Богородицу Владычицу нашу, и великого святителя Николу.

(л. 43об) Чюдо Пресвятыя Богородицы о некоем человеце именем Никите

Человек некий именем Никита, ремеством убо кожевник, от града Костромы. Сему убо Никите случися такова тяжка болезнь: лежа убо на одре своем аки непочивательно древо, и не владеяше ни руками ни ногами; постризает убо власы главы своея, и восприемлет иноческий образ зелныя ради тоя немощи в дому своем, нарицает же ся имя ему во иноческом чину Никандра, о преславных чюдес бываемых от пречистаго и чюдотворнаго образа Пресвятыя Владычицы нашея Богородицы и Присно Девы Марии честнаго и славнаго Ея Одигитрия, в пречестней Ея обители, в новой пустыни иже зовомая Игрища. И абие обещавается тамо и ту со живущими иноцы до конца терпети, и вскоре исцеление получи, и приходит (л. 44) в пресвятую обитель, и обещание свое исполняет. И пев молебен Пресвятей Богородице и великому чюдотворцу Николе, и совершеное здравие получи.

Чюдо Пресвятыя Богородицы о человеке некоем именем Иякове

Человек некий именем Ияков Феодоров сын от веси нарицаемыя Федотковы, земледелец сый, пореклом Почовной. Сей убо Иаков прииде в пречистую обитель Пресвятыя Владычицы нашея Богородицы, и поведа нам сам о себе глаголя: аз, рече, лежах в дому своем восемь недель на одре своем в раслаблении не владея ни руками ни ногами, точию родители своими носим бываше нужды ради. И слышах о преславных чюдесех Пресвятыя Владычицы нашея Богородицы в пречестней Ея обители в новой пустыни, иже зовомая Игрища, и обещахся итти в пре(л. 44об)чистую Ея обитель, и тамо у чюдотворнаго Ея образа молебная отпев, и в той час здравие получих. И отойде в дом свой радуяся, славя и благодаря Господа Бога, и Пречистую Его Матерь Пресвятую Владычицу нашу, и великого чюдотворца Николу.

Чюдо Пресвятыя Богородицы о человеце некоем именем Поликарпе

Человек некий именем Поликарп, порекло Добрыня, от веси нарицаемыя Малыя Соли, деревни Базина. Той убо Поликарп поведа нам о преславных чюдес Пресвятыя Владычицы нашея Богородицы и Присно Девы Марии, бываемая от пречистаго и чюдотворнаго Ея образа: мне убо, честнии отцы, по некоей вине случися слепота зла очима моима, и бе в той скорби стражда люто зело два лета, ниже рук своих зря, и бе совопрошаяся (л. 45) сродник своих [2] и сосед и ближних, они же совещаша о мне ов сице, а инии инако; последи же приидох к некоей жене, именем Марии, бе убо та вдовствующи десять лет, и поведал ей вся приключшаяся злая, вкупе же и совопрошахся, откуду бы улучити очима моима свет открыти; она же благоразумна сущи, слышав от мене таковыя глаголы о приключшихмися таковых мне злых, совещевает ми благ совет: иди, рече, человече, и отпой понахиду по матери своей, и проси у нея прощения вкупе же и благословения, потом же иди в новопросвещенную обитель Пречистыя Владычицы нашея честнаго и славнаго Ея Одигитрия, и великого чюдотворца Николы, и соверши тамо молебная у чюдотворнаго Ея и пречистаго образа, и великому чюдотворцу Николе, и никакожь надежды погреши, (л. 45об) но вскоре благодать и милость и исцеление получиши. Аз же слышах таковый совет, и вся повеленная ею сотворих, и отпев понахиду по матери своей, и притекох ко гробницы матере моея, и плакахся горько, просяще прощения о своих согрешении, купно же и благословения, бе бо по некоему навождению вражию имех крамолу к матери моей при смерти ея. По отпении же понахиднем матери моея мало время пребыв в дому своем, якоже никакожь надежы погрешив, но вскоре от пречистаго и чюдотворнаго Ея образа совершеное здравие и прозрение очима моима получих, и от’идох в дом свой радуяся, славя и благодаря Бога, и Пречистую Его Матерь Владычицу нашу Богородицу, и великого чюдотворца Николу.

Чюдо Пресвятыя Богородицы о жене Марии

(л. 46) Жена [3] именем Мария Силивестрова дочь, пореклом Сарлова, вдова сущи, от веси нарицаемыя Малыя Соли. Сия убо Мария поведа нам сице: мне убо честнии отцы случися сицевая немощь, яко огнем жегома люте, и от тоя зельныя болезни глава распухла, и мнети ми ся яко звон и лом во главе ми бысть, и от таковыя нестерпимыя болезни ниже сна мощи приимати,  ниже лежати, ниже седети, и просто рещи, яко близ смерти. И слышах о преславных чюдесех бываемых от чюдотворнаго и пречистаго образа Пресвятыя Владычицы нашея Богородицы, иже есть в новой пустыни, и обещание положих тамо молебная совершити, и абие с великою нужею ятся пути, нецыи же видяще мя покиваху главами своими, глаголюще ми: вскую толикий долгий путь тещи нудишися, (л. 46об) уже бо в мертвых вменился еси. Аз же слышах таковыя глаголюща ко мне и глагола к ним: аще и на пути умрети, не отпаду надежы спасения моего. Егда же приидох в пречистую обитель Пресвятыя Владычицы нашея Богородицы, и со слезами пред чюдотворною иконою падох, просяще прощения о своих согрешении, купно же и о исцелении. О преславное и неизреченное Пресвятыя Богородицы милосердие: никакоже надежы не погреши, но вскоре исцеление получи, милостию Пресвятыя Владычицы нашея Богородицы, и молением великаго чюдотворца Николы, и соверши молебная и от’иде в дом свой радуяся, славя и благодаря Бога Господа нашего Иисуса Христа, и Пречистую Его Матерь Владычицу нашу Богородицу, и великого чюдотворца Николу.

(л. 47) Чюдо Пресвятыя Богородицы о жене Ирине

Жена некая именем Ирина Семионова дщерь, от веси нарицаемыя Ворщина [4], и та вдова сущи. Случися убо той Ирине по некоей вине немовати, и не глаголати ничтоже, токмо о нужных си рукою помавааше [5]. И приходит к чюдотворному образу Пресвятыя Владычицы нашея Богородицы, и припадает и молится со слезами; и егда начаша пети молебная, и прииде время чести Святое Евангелие, и тогда ей разверзеся язык, и нача глаголати ясно, милостию Господа Бога и Спаса нашего Иисуса Христа, и Пречистыя Его Матере Пресвятыя Владычицы нашея Богородицы, и молением великого чюдотворца Николы, и от’иде в дом свой радуяся, славя и благодаря Господа Бога и Спаса нашего Иисуса Христа, и Пречистую Его Матерь Владычицу нашу Богородицу, (л. 47об) и великого чюдотворца Николу.

Чюдо Пресвятыя Богородицы о человеке Панкратии и о жене его Матроне

Человек некий именем Панкрати, пореклом Деряба, художество имея лекарство, жена же ему именем Матрона, по некоей убо вине сей Матроне случися си внезапу слепота очима; яко в год вечера мало поболе очима, и мнящи яко естества болезнь прииде, якоже и множицею случается человеком, по утрии жь воста, и абие ни висма виде. Горце убо болезнуя и стеняше о внезапном ослеплении своем, вкупе же воспоминая и согрешения своя, и пребысть убо не видя пятнатцать недель. И слыша о преславных чюдесех Пресвятыя Владычицы нашея Богородицы, бываемых от пречистаго и чюдотворнаго Ея образа, иже есть в новой пустыни на реке Песошне, (л. 48) и обещавается молебная совершити Пресвятей Владычице нашей Богородице. Всемилостивая же Пресвятая Владычица наша Богородица не презре сердечнаго воздыхания ея, но на самый праздник праздником и торжество торжеством, пречестнаго Рожества Господа Бога и Спаса нашего Иисуса Христа, даде ей единому оку прозрение. Таже предиреченный той муж Панкратий и з женою своею призывает в дом свой священника, и совершают обещание свое, повелевают отпети молебен Господу Богу и Спасу нашему Иисусу Христу, и Пречистей Его Матери, и преподобному чюдотворцу Макарию иже есть на реце Унже, и абие совершенное обема очима своима исцеление и прозрение получает, милостию Господа Бога и Спаса нашего Иисуса Христа, и Пречистыя Его Матере Пресвятыя Владычицы нашея Богородицы и Присно (л. 48об) девы Марии, и молением великого чудотворца Николы и преподобнаго Макария Же[л]товодскаго чюдотворца. По некоем же времени и совершенно обещание свое исполняют, приходят убо в новую пустыню, в пречистую и святую обитель к чюдотворному образу Пресвятыя Владычицы нашея Богородицы и Присно Девы Марии молебная совершити и обещание свое исполнити. Егда же прииде сей предиреченный Панкратий с женою своею в пречистую обитель, и молят настоятеля тамо сущаго, дабы молебная отпел ко Пресвятей Владычицы нашей Богородицы и святому чюдотворцу Николе, и даша ему по силе помощи, настоятель же отпев молебная Пресвятей Богородице и великому чюдотворцу Николе и отпусти их с миром, славя и хваля Бога, и Пречистую Его Матерь, и великого (л. 49) чюдотворца Николу.

Еяже святыми молитвами всем нам отпущения грехов дарует Господь наш Иисус Христос, и труждающимся в церковных или коих подвизех пособствует, и мир даст, и здравие довольное и безмятежное рабом Своих [6] промыслит, и от всех завидящих, ненавидящих и пакостящих сохраняет и утешает, даже и обитель сию святую, и живущих в ней от всех видимых и невидимых врагов сохранит. Се же ходатайством Преблагословенныя Владычицы нашея Богородицы и Присно Девы Марии, честнаго и славнаго Ея Одигитрия, молитвами святителя и чюдотворца Николы, да сие житие тихо и безмятежно поживем, и в будущем веце Царствия Небеснаго насладимся, егоже буди всем нам получити благодатию Господа Бога (л. 49об) и Спаса нашего Иисуса Христа, с Нимже купно слава Отцу и Сыну и Святому Духу, ныне и присно и во веки веков. Аминь.

Примечания публикатора

1. Здесь и далее это слово приводится в единообразном виде, хотя написание его корня под титлом формально подразумевает прочтение -свящ- .
2. На полях приписка: вкупе же.
3. На полях приписка: некая.
4. Правильно: Борщина.
5. Так в тексте.
6. Так в тексте.