(НБ МГУ, ОРиРК, N 302, л. 625-646)
(л. 625) Месяца июня в 12 день явление пречистаго и чюдотворнаго образа Пресвятыя Богородицы Владычицы нашея и Присно Девы Марии, честнаго и славнаго Ея Одигитрия, иже есть на Костроме в новой пустыни на реце Песошне, и сия чюдеса чюдотворнаго образа Владычицы нашея Богородицы Одиги[три]я. А свидетельствовал сия чюдеса преосвященный Варлам митрополит Ростовский и Ярославский.
[на полях другими чернилами и другим почерком: глава 33]
Ныне обратимся паки братие, и восплачемся пред Господем сотворшим нас, и возопием Ему сокрушенным сердцем, и исповедаем согрешения наша, беззаконновахом, не оправдихомся пред Тобою; понеже повеления Твоя преступихом, понеже заповеди Твоя презрехом, понеже забыхом оправдания и судбы Твоя, понеже вослед вожделений и помышлений наших ходи[хо]м, понеже недостойне по имени нашем (л. 625об) и обетовании пожихом, понеже милосердие Твое затворихом, понеже человеколюбие Твое спрятахом беззаконными злобами нашими, имиже возрастихом; но не предаждь нас до конца, имени Твоего ради святаго, ниже раззори завета Твоего, ниже остави милости Твоея от нас, щедрот ради Твоих и милосердия Твоего ради и Блага(га)го [1] Отца, благости ради и милости Святаго Твоего Духа. Помяни, Господи, многия щедроты Твоя, помяни от века многая чюдеса Твоя и не помяни наших беззаконий первых, но немощи наша и страдания помяни; призри с небесе и виждь, и посети нас, винограда сего наследие Твое, и изправи егоже насади десница Твоя, и даруй нам мир, Подателю Господа [2] мира Благий, честныя ради и святыя Крове Твоея, от неяже оживихомся, и спасения ради мира сего излиял еси. И даруй Пречистыя ради Твоея Матере, Еже есть (л. 626) общее великое Упование, и общее Заступление, и Ходатаица нам всем, и Крестителя ради Твоего Иоанна Предтечи, и святых ради апостол и святых ради мученик, иже имени Твоего ради крови своя пролиявших, и святых ради пророк Твоих, и святых ради отец и патриарх и учителей, и угодити Тебе, и Твоему Милосердому Отцу, и Утешителю и Святому Твоему Духу; не на оправдания бо наша уповаем, но на милость и щедроты Твоя, понеже бо иного кроме Тебе не вемы, имя Твое нарицаем и от Тебе ищем помощи, како исповедати нам прегрешения своя к Богу, и к Тому прибегаем и уповати на милосердие Его неизреченное, и милости подаст и воскресит нас от греха, и сохранит нас от всякаго гнева и нужды и пленения и скорби; обаче возвратимся на предлежащую повесть. Сия нам содеяся (л. 626об) праведным судом Божиим, бысть же сице в лето 7079, при державе благовернаго царя и великого князя Иоанна Васильевича всея Росии, и при его благородных царевичах Иоанне и Феодоре, и при святейшем митрополите Дионисии. И в то время належащу велию мору по многим градом и по селом, и многи грады и веси Росийского [3] государьства, и многия грады и веси велиим запустением запустеша. Достиже же и до пресловущаго града Костромы, и многия окрестныя веси града того без остатку запустеша, и вместо богонасажденнаго винограда, по образу Божию созданнаго человека, дивия дубравы возрастоша, и многия обители и святыя и священныя церкви запустеша. Темже оставльше начало словесе, на совершение известити желаем вашему боголюбию, понеже вашу любовь зру [4] якоже (л. 627) некая плодовитая земля семена приемлет, ово сто, ово шестьдесят. Да коснемся иже о сих беседе, елико подаст Дух Святый, прежде похваливше ваше усердие теплое; толико бо к Церкви ваше тщание, елико чадом к матери, елико жаждущему ко источнику, елико кораблю ко пристанищу; толико и нас ве[се]лит преспевание ваше, якоже ныне яви нам о сем Милосердый Господь Бог наш, Своея ради неизреченныя благодати в сие последнее время. В лета 7132 при державе благовернаго царя и великого князя Михайла Феодоровича всея Росии, и при святейшем патриархе кир Филарете Московском и всея Росии, показа нам праведное и пресветлое солнце, и отверзе породу Едема затвореннаго, яви пресветлую икону, звезду небесную, источник неизчерпаемый, Своим человеколюбием (л. 627об) и смотрением, в прежде запустевших дивиих дубравах сокрываему чюдную икону Матере Своея и нашея Владычицы Богородицы и Присно Девы Марии, честнаго и славнаго Ея Одигитрия, и Свой человеколюбивый образ яви убо сицевым образом Свое честное сокровище, источник неисчерпаемый жаждущим и приходящим с верою, чюдный Свой образ. От предел убо града Костромы, веси нарицаемыя Савинска, сын боляр’ский именем Емелиян Иоаннов сын по прослытию Севрюк. Сему убо Емелияну по некоей вине случися ему слепота очима, и страда убо тою болезнию 5 лет, и много своего имения врачем разда, и никакож[е] ползы обрете, но паче в горшая прииде, и не виде ничтоже. И в некое время отроцы сего Емелияна пасяху овцы и ослята, и случися им пасти (л. 628) в некоей пустыни, ейже имя Игрища, на реце Песошне, и видяху бо в той пустыни церковь зело престаревшуся, яко близ разрушения, еже углом распадшимся, церковь же та во имя Николы чюдотворца; пришедшим же им во священную и святую церковь помолитися, яко есть обычай православным християном молитися, и се абие узреша чюдотворный Пречистыя Богородицы образ с Превечным Младенцем Господем нашим Исусом [5] Христом, удивишася зело, глаголюще: како убо церковь зело престаревшися, образ же Пресвятыя Богородицы яко ново написан; отшедшим же им во своя сии, и вся по ряду яже видяху, и поведаша господину своему, яко видехом мы, господине наю, преславная днесь во оной сице пустыни, имя нарекше, церковь убо, господине, зело престарелася, образ же в ней Пресвятыя Богородицы на престоле стоящь яко ново написан. (л. 628об) Слышав же сие предиреченный муж Емелиян от рабов своих таковыя преславныя глаголы, слез убо и радости исполнися, яко обретоша безценное сокровище, воистинну убо безценное, емуже и всего мира богатство не довлеет. Вскоре убо посылает от рабов своих в пресловущий град Кострому по духовнаго отца своего священно иерея Феодора, соборныя церкви Пресвятыя Живоначалныя Троицы, и молит убо его, дабы пришел на то преславное видение, и взял бы с собою вся яже на совершение молебнаго пения. Послушлив убо бывает духовный той отец к сыну своему, и в(ъ)скоре [6] приходит по умолению его, и вся восприемлет потребная ему, еже есть на совершение молебнаго пения; вкупе же той предиреченны[й] муж Емилиян емлет с собою ближних и сосед, и молит дабы (л. 629) пошли с ним на преславно то видение и совершили бы о нем к Пресвятей Богородице молебное пение; они же слышавше от него таковая, послушливи ему бывают, вкупе же и радости исполнишася; и абие убо приходят в преди реченную пустыню, и видевше всю истинну яже слышавше от преди реченных отрок, и вси воздаша славу Господу Богу и Пречистей Его Матери, яко таковая преслав(ъ)ная видехом; и начаша пети молебная пред чюдотворным образом Пресвятыя Владычицы нашея Богородицы; егда же убо прииде время кропити святою водою, оле преславное чюдо! Кропя убо и той преди реченный иерей Феодор чюдотворный образ Пресвятыя Владычицы нашея Богородицы, и абие та святая вода во святую чюдотворную икону яко в губу вхождаше, на очию же пречистаго и чюдотворнаго образа Владычицы нашея Богородицы святая та вода (л. 629об) на долг час стояше, помалуж времени потекши та святая вода от очию яко струя! О преславное и неизреченное милосердие Владычицы нашея Богородицы и Присно Девы Марии, яве есть, яко источник чюдес дарует от пречестнаго и чюдотворнаго Своего образа Одигитрия приходящим к нему с верою. Священник же взем святую воду и покропи слепаго, он же не погреши надежди своего спасения, но в(ъ)скоре получи своима очима исцеление, и прозре светло яко никогдаже боле очима своима. Видевше же сия преславныя чюдеса Пресвятыя Владычицы нашея Богородицы от чюдотворнаго Ея образа, священник Феодор и прочии клеврети их, темже и мы воздаша славу и хвалу Господу Богу и Пречистей Владычице нашей Богородице, от’идоша во своя сии радующеся, исповедаша сия преславная чюдеса Пресвятыя (л. 630) Владычицы нашея Богородицы, и о чюдотворном Ея образе, яков бе светел яко днес [7] написан, и о прекрасном том месте, во граде Костроме и во всех пределех его; слышавше же сия преславная чудеса православнии и благочестивии народи града Костромы, радости духовныя исполнишася. Приспевшу же празднику Пресвятыя Владычицы нашея Богородицы Положение ризы; тогда убо готовляхуся благочестивии народи на пошествие в новопросвещенную пустыню, и потекоша с великим чтянием, не токмо от града Костромы, но и ото всех предел его мужие и жены и дети и всяк возраст, друг друга понуждаху на преславное видение, не токмо слышати хотяще, но и видети пречюдный образ Пречистыя Богородицы, имяху бо благочестивии народи веру велию, в новопросвещенную (л. 630об) пустыню к чюдотворному образу Пресвятыя Владычицы нашея Богородицы и великому чюдотворцу Николе; и прихождаху на вся праздники от многих весей не токмо ж [8] женами и детми, но и с сущими младенцы, тамо многия пения совершаху, в нихже бе и нарочитые мужи, о нихже последи скажем; и кождо их своего прошения, но вся яже на ползу своего прошения [9]. Мало ж народу отшедшу и ставшим тамо на некоем месте прекрасном, и зрящим к пречистому и чюдотворному образу Пресвятыя Владычицы нашея Богородицы, и на святую церковь молящеся, и многи слезы проливающе, и глаголюще сице: О Пречистая Владычице Богородице, прослави имя Твое святое на сем месте. Не по мнозе же времени молитвою Пресвятыя Владычицы нашея Богородицы обитель бысть, не бе бо еще живущих в новопросвещенной обители сей. (л. 631) И возвращахуся кождо во своя сы, и радующеся, славяще и благодаряще Бога и Спаса нашего Исуса Христа, яко сподоби нас такова безценнаго дара; такожде славяще и благодаряще Пресвятую Владычицу нашу Богородицу, яко сподоби нас видети Свой пречистый и чюдотворный образ, яко посети нас Своим неизреченным светом, благодатию и человеколюбием Господа Бога и Спаса нашего Исуса Христа, Ему же слава ныне и присно и во веки веком, аминь.
О пришествии в пустыню четырех человек, и о зачале монастыря
Слышавше же сия преславная чюдеса Пресвятыя Владычицы нашея Богородицы и Присно Девы Марии, бываемая от пречистаго Ея образа в новопросвещенной пустыни, благочестивии мужие от пресловущаго града Костромы, имже имена: Потапий и Григорий, Карп и Андрей, оставляют убо (л. 631об) вся своя домы и жены и чада, ревнующе древним богоносным отцем, якоже убо они древнии отцы, иже прежде закона божес(ъ)твеннии мужи, не писмены или словесы учими бяху, но чисто имуще сердце, духовным осиянием просвещахуся; такожде и сия(нием) [10] благочестивии мужи подражатели быша тем древним святым отцем. Приходят убо в новопросвещенную сию пустыню, не во едино убо время, ни во един день, но един по единому в мале времени собрашася, и мало убо потрудишася еще в миръстем образе, не бе бо еще в пустыни той иноческаго чина и священническаго; аще бо и молебная пения у чюдотворнаго и пречистаго образа Пресвятыя Владычицы нашея Богородицы совершаху, но обаче от града Костромы и от иных весей священницы прихождаху службы совершающе (л. 632) и паки во своя си отхождаху. По некоем же времени призывают убо некоего инока имеюща священнический чин, и постризают власы глав своих, вкупе же и всех мирских, и паки начаша болми труды к трудом прилагати. Аминь.
Чюдо Пресвятыя Богородицы о недостатце пищи
По некоем убо времени, недоставши пищи, не имеюще бо чесо предложити на снедение, и хотяху изыти до некия веси, дабы купили в снедь потребная им, и изыдоша до дороги, близ убо предлежит путь пустыни тоя; и абие милостию Божию и Пречистыя Богородицы милосердием обретоша на пути три хлебы на некоем древе, на том же бе древе воображен Животворящий Крест; прияша убо хлебы, и возвратишася паки в пустыню, (л. 632об) благодаряще Господа Бога и Пречистую Его Матерь Пресвятую Владычицу нашу Богородицу, яко не остави раб Своих терпящих в пустыни сей имени Своего ради, и паки начаша труды к трудом прилагати. Слышавше же благочестивии народи града Костромы и вси иже окрест живущии, яко уже и мниси селитву имут в новопросвещеной пустыни, и начаша наипаче веру велию и любовь стяжати и приходити во святую пустыню, совершающе молебная пения у чюдотворнаго образа Пресвятыя Владычицы нашея Богородицы и Присно Девы Марии. И многия оставиша домы и родители своя, жены же и чада, и быша иноки, и абие милостиею Божиею и благодатиею и Пресвятыя Богородицы Владычицы нашея, нача то святое место разпространятися.
(л. 633) О знамении святем места того
Поведаша нам нецыи христолюбцы глаголюще: некогда шествующима в мимо шедшем времени близ пустыни сея, и слышахо[м] звон велий, и мнеша яко звон той у Святыя и Живоначалныя Троицы Ипатц[к]ого монастыря; и приидох убо во обитель Пресвятыя и Живоначалныя Троицы Ипатского монастыря, и абие начаша у Пресвятыя и Живоначалныя Троицы к заутрени благовестити; мы же убо о сем зело удивишася, откуду убо нам в пустыни сей толикий звон слышавше, и глаголаху, яко быти некоему преславному знамению в пустыни сей, не по мнозе же времени еже и бысть.
Чюдо Пресвятыя Богородицы о некоей жене, егда начаша созидати святую церковь
Тогда убо приидоша множество народа от града Костромы и предел его в ново просвещенную обитель к чюдотворному образу (л. 633об) Пресвятыя Владычицы нашея Богородицы, вкупе же прииде с ними и жена некая именем Пелагея, бе же сия Пелагея одержима лютою болезнию глухотою. Егда же начаша пети молебен Господу Богу, и Пречистей Его Матери, и великому чюдотворцу Николе о созданней святей церкви, тогда убо сия преди реченная она жена Пелагея припаде с теплою верою и со слезами к чюдотворному образу Пресвятыя Богородицы Владычицы нашея, и великому чюдотворцу Николе, просяще прощения своих согрешений, вкупе же о исцелении; и никакож[е] погреши своего спасения, но вскоре получи своима ушима слышание, и нача ясно слышати, яко ни весма поболе; и от’иде в дом свой радующеся, славяще и благодаряще Бога, и Пречистую Его Матерь Владычицу нашу Богородицу, и великого чюдотворца Николу.
Чюдо Пресвятыя Богородицы о швеце некоем именем Павле
(л. 634) Во ино же время приведоша некоего человека от града Костромы именем Павла, бе же той Павел ремеством швец; случижеся убо ему по некоей вине ума иступити, еже не знаяше многажды и сам себе не знаяше, и хотяше себе погубити лютою смертию; слышавше же родители его и ближнии друзи преславная чюдеса, бываемая в ново просвещенной пустыни от пречистаго и чюдотворнаго образа. И абие притекоша с теплою верою в ново просвещенную обитель, вкупе же поимше с собою преди реченнаго Павла; припадают убо со слезами пред чюдотворною иконою Владычицы нашея Богородицы и великого чюдотворца Николы, просяще прощения о своих согрешении[х], вкупе же и о суседе своем Павле, о исцелении его; и никакоже надежды погреши, но милостию Божиею и Пречистыя Его Матере Пресвятыя Владычицы нашея Богородицы, и великого чюдотворца Николы (л. 634об) другу своему Павлу въскоре исцеление дарова; от’идоша в домы своя радующеся, славяще и благодаряще Господа Бога и Спаса нашего Исуса Христа, и Пречистую Его Матерь, и великого чюдотворца Николы; радостно воспоминающе истинное и неложное апостольское слово, якоже рече: братие, молитеся друг о друзе яко да исцелеете.
Чюдо Пресвятыя Богородицы о некоем человеце Иоанне
Человек некий именем Иоанне земледелец именем Иоан земледелец сый [11] деревни Теплюковы; той убо Иоанн одержим бе сицевою болезнию: два убо лета велми страдаше болячки, и не точию же единема тема, но и рукама не владеяше; и абие приходит во обитель Пречистыя Богородицы честнаго и славнаго Ея Одигитрия, и великаго чюдотворца Николы, иже есть пореклом на Игрищах, и обещевается восприяти иноческий образ (л. 635) и ту с сущими иноки терпети; и отпев молебная Пресвятей Владычице Богородице и великому чюдотворцу Николе, и от лютыя тоя болезни милостию Пречистыя Владычицы Богородицы и молением великого чюдотворца Николы здравие получи. Ненавидяй иже диявол добра роду человечю, вложи ему в сердце сицевое непотребное слово и душе вредное дело, яко да идет в дом свой, и еще неколико лет поживет со женою и детми; и абие иде в дом свой радуяся, и мало время пребысть в дому своем, и лютейши перваго в предиреченную болезнь впаде; и мало время проводи, и воспомяну согрешение свое, купно же и обещание; и абие паки приходит в пречистую обитель Пресвятыя Владычицы нашея Богородицы, просяще прощения о своих согрешении, и остризает власы главы своея, купно же со от’ятием и всех мирских вещей, и пев (л. 635об) молебная Пресвятей Богородице Владычице нашей и великому чюдотворцу Николе; и милостию Пресвятыя Владычицы нашея Богородицы и молением великого святителя и чюдотворца Николы и совершенно исцеление получи, славя и благодаря Бога, и Пречистую Его Матерь Владычицу нашу Богородицу, и великого чюдотворца Николу.
Чюдо Пресвятыя Богородицы о некоем человеце Иоаникие болящем главою
Человек некий именем Иоан Александров, чином убо подьячей тогож града Костромы; случися убо тому Иоанну в тяжкую болезнь главную пасти иже наричут ея лом, и от тоя зел’ныя болез’ни глава ему распухла, и во очесех свет помрачися, и сна нимало приимаше. Той убо Иоан мнев, яко по прилучию случися ему естественная немощь, якоже и множицею случается человеком. И на первой недели Великого поста в четверток (л. 636) восхотеся ему вина пити, мнев убо поне малу отраду тем от болезни тоя получити; испившу же ему, и абие порази его некая сила, и лежа без памяти еле жив. И егда убо прииде в себе, воспомяну своя согрешения, оставляет вся и обещавается по монастырем и по чюдотворным местом ходити; и многи убо монастыри и чюдотвор(ъ)ныя места обшед, восхоте убо ити в пресловущий град Кострому, да и тамо поклонится во святых местех; и егда бысть близ Пречистыя Богородицы обители, вопрошает убо клевретов своих о святем месте сем; они же ему повещают [12], яко сие место новая пустыня, икона ж ту Пречистыя Богородицы чюдотворный образ. Он же повелевает им вести себе в пречистую обитель, и абие приходит к чюдотворному образу Пречистыя Богородицы, прося и припадая (л. 636об) со слезами прощения о своих согрешении, и молебная пев Пресвятей Владычице нашей Богородице, и великому чюдотворцу Николе, потом же (же) [13] начат святую и Божественную литоргию слушати. И егда нача священник чести святое Евангелие, и в том часе Пресвятая Владычица наша Богородица от пречистаго и чюдотворнаго Своего образа исцеление и прозрение ему дарова, и бысть весь здрав, славя и благодаря Господа Бога и Спаса нашего Исуса Христа, и Пречистую Его Матерь Владычицу нашу Богородицу, и святаго великого святителя Николу чюдотворца, бе бо в той день случися праздник и торжество торжеством, пресветлое Воскресение Господа Бога и Спаса нашего Исуса Христа; той же убо предиреченный муж Иоанн потруждався в пречистей обители Пресвятыя Владычицы нашея Богородицы доволно время, славя и благодаря Господа Бога и Спаса нашего Исуса Христа, (л. 637) и Пречистую Его Богоматерь, и великого святителя Николу.
Чюдо Пресвятыя Богородицы
Инок некий именем Калистрат, тоя же честныя обители; случися убо тому Калистрату впасти в тяжкую болезнь, заняся убо ему водный проход, и от тоя болезни приближися ко смерти; приспевшу празднику великого чюдотворца Николы, ста убо той предиреченный Калистрат на обычном своем правиле, якоже обычай иноком, и мало некако воздрема, и виде к себе пришедша светоносна мужа, сединами яко волнами украшенна, и глаголюща к нему: почто, рече, не отпоеши молебная Пресвятей Богородице и великому чюдотворцу Николе? Он же возбнув, и скоро притек к чюдотворному образу Пречистыя Владычицы нашея Богородицы и Присно Девы Марии, и пев молебная Пресвятей Богородице и великому чюдотворцу Николе, исцеление получи, славя Господа Бога и Пречистую Его Матерь.
(л. 637об) Чюдо Пресвятыя Богородицы о человеке Фаддее
Человек некий именем Фаддей, земледелец сый от веси нарицаемыя Пушканка, близ убо пречистыя обители Пресвятыя Богородицы яко два поприща; сей убо Фаддей весь разслаблен, и никакоже владея рукама и ногама, пребысть же в тяжкой той болезни полгода; и повелевает себе вести во обитель, и тамо исцеление получи.
Чюдо Пресвятыя Богородицы о некоем человеке именем Зиновии
Человек некий именем Зиновий, Чюдова монастыря хрестьянин, от веси нарицаемыя Мискаго погоста; сему убо Зиновию случися такова болезнь тяжкая и в руках зелная щепота, и ина некая внутренняя немощь; и повеле себе вести во святую и пречистую обитель Пресвятыя Богородицы; и приведоша его и внесоша на полъсти во святую церковь, и певше молебная Пресвятей Богородице Владычице нашей и великому чюдотворцу Николе, (л. 638) исцеление получи, и от’иде в дом свой радуяся, славя Господа Бога и Спаса нашего Исуса Христа, и Пречистую Его Матерь Владычицу нашу Богородицу, и великого святителя Николу.
Чюдо Пресвятыя Богородицы о девице Гликерии
Девица некая именем Гликерия от града Костромы, отца имущи именем Аггея, сия убо Глекерия [14] одержима бе лютою болез’нию юже наричют черною, не точию же та едина лютая немощь, но еще иногда руки и ноги скорчеваше; пребысть же в зелной той болезни пол четверта лета; призывает убо и молит родителей своих, дабы ю отвезли в пречистую обитель Пречистыя Богородицы. Бывает убо послушлив отец дщери своея, приведе ю в пречистую обитель, и припадает к чюдотворному образу Владычицы нашея Богородицы, и молит о отпущении своих согрешений, о исцелении дщери своея; и пев молебная Пресвятей Богородице и великому чюдотворцу (л. 638об) чюдотворцу [15] Николе, и никакоже надежды погреши, но милостию Владычицы нашея Богородицы и молением великого чюдотворца Николы вскоре исцеление получи; и от’иде в дом свой радуяся, славя Господа Бога и Спаса нашего Исуса Христа, и Пречистую Его Матерь Пресвятую Владычицу нашу Богородицу, и великого чюдотворца Николу.
Чюдо Пресвятыя Богородицы о человеке некоем Василии
Человек некий от предел костром(ъ)ских, от веси нарицаемыя Высокого Стану, деревни Погорелки, именем Василий, земледелец сый; сей убо Василий пришед в пречистую обитель Пресвятыя Владычицы нашея Богородицы и поведа сам о себе глаголя: аз, рече, впаде в таковую болез’нь тяжку, яко мнети ми дошедшу до врат смертных. Болез’нь же ми сицева бе: полглавы моея велми боляше, и рамо правое и рука, и на шии струп великий; и от толикия зельныя болез’ни яко забытися ми на мал час, и абие в том часе (л. 639) слышах глас глаголющ ко мне: человече, что страждеши боля; обещайся, рече, итти в новую пустыню, в пречистую обитель ко Пречистей Богородице, и у Ея пречистаго и чюдотворнаго образа, и отпой молебен, и аще не имаши что дати, и ты обещайся в пречистей обители потруждатися, и до конца здравие получиши. Аз же от того часа опамятовахся, и зрех семо и авамо [16], и нико[го]же видех; и веру ят гласу тому, якоже от Господа Бога сие извещение бысть, и обещахся доити до пречистыя обители и тамо молебен отпети Пречистей Богородице, и ту с сущими отцы потруждався; и абие ощутихся [17] и во здравие пришед, и идох до пречистыя обители, и тамо пев молебная Пречистей Богородице и великому чюдотворцу Николе, и милостию Владычицы нашея Богородицы, и молением великого чюдотворца Николы и совершенное здравие (л. 639об) получих, и ту потруждахся с сущими отцы в пречистей обители; и от’идох в дом свой, радуяся и благодаря Господа Бога и Спаса нашего Исуса Христа, и Пречистую Его Матерь Владычицу нашу Богородицу и Присно Деву Марию, и великого святителя Николу чюдотворца.
Чюдо Пресвятыя о жене Марии
Жена некая именем Мария от веси нарицаемы Малышкова; сия убо Мария пришедше во святую обитель Пресвятыя Владычицы Богородицы, честнаго и славнаго Ея Одигитрия, и сама о себе поведа нам глаголя: аз рече, глаголю, впадши ми в болез’нь тяжку зело, и в той болез’ни волокло ми руки и ноги вместо, и не точию же то едино, но и на главе болез’нь была люта зело, и в той зелной болезмни страдавшу ми безпрестани целое время зимное, и уже приближися до смерти, и бывшу ми в забытии ума. Оле преславное и дивное (л. 640) и неизреченное чюдо! [18] Господа Бога и Спаса нашего Исуса Христа, и Пречистыя Его Матери Владычицы нашея Богородицы милосердием, яко тако убо не оставляет, но посещает и снабдевает, и милует раб Своих; и абие явимися Пресвятая Богородица Владычица наша и Госпожа сице: мнетися яко спящи, и рече ми: о жено, что толико время в сицевой болезни пребываеши стражда; обещайся ся [19] убо итти в пречистую Мою обитель, в новую пустыню иже зовомую Игрища; и у чюдотворнаго Моего образа отпой молебен и свещу постави. Аз убо возбнув от сна и начах молитися Пресвятей и Пречистей Владычице нашей Богородице, и обещахся итти в пречистую и святую обитель, в новую пустыню иже зовомую Игрища, и у чюдотворнаго и пречистаго Ея образа молебная совершив и свещу поставити. О дивное чюдо! (л. 640об) Яко в той час всю здраву себе ощути; и приидох убо в пречистую обитель Пречистыя Богородицы и Присно Девы Марии и великого святителя и чюдотворца Николы, и пев молебная у чюдотворнаго и пречистаго Ея образа, и великому чюдотворцу Николе, и совершенное здравие получи, и возвратися в дом свой, радуяся и славя Господа Бога, и Пречистую Богородицу Владычицу наша [20], и великого святителя Николу.
Чюдо Пресвятыя Богородицы о некоем человеце именем Никите
Человек некий именем Никита, ремеством убо кожевник, от града Костромы; сему убо Никите случися такова тяжка болезнь: лежа убо на одре своем аки непочивателно древо и не владеяше ни руками ни ногами; постризает убо власы главы своея и возприемлет иноческий образ зел’ныя ради тоя немощи
(л. 641) в дому своем, нарицаетжеся имя ему во иноческом чину Никандра. О преславных чюдес, бываемых от пречистаго и чю[до]творнаго образа Пресвятыя Владычицы нашея Богородицы и Присно Девы Марии честнаго и славнаго Ея Одигитрия, в пречестней Ея обители, в новой пустыни иже зовомая Игрища; и абие обещевается тамо вклад [21] дати, и ту со живущими иноцы до конца терпети, и вскоре исцеление получи, и приходит в пресвятую обитель, и обещание свое исполняет, и пев молебен Пресвятей Богородице и великому чюдотворцу Николе, и совершенное здравие получи.
Чюдо Пресвятыя Богородицы о человеке некоем именем Иякове
Человек некий именем Ияков Феодоров сын от веси нарицаемыя Федотковы, земледелец сый, пореклом Почовной; сей убо Ияков прииде в пречисту обитель Пресвятыя Владычицы нашея Богородицы и поведа нам (л. 641об) сам о себе глаголя: аз, рече, лежах в дому своем 8 недель на одре своем, в разслаблении, не владея ни руками ни ногами, точию родители своими носим бываше нужды ради. И слышах о преславных чюдесех Пресвятыя Владычицы нашея Богородицы в пречистей Ея обители в новой пустыни, иже зовомая Игрища, и обещахся итти в пречистую Ея обитель, и тамо у чюдотворнаго Ея образа молебная отпев, и в той час здравие получих; и от’иде в дом свой, радуяся, славя и благодаря Господа Бога, и Пречистую Его Матерь Пресвятую Владычицу нашу Богородицу, и великого чюдотворца Николу.
Чюдо Пресвятыя Богородицы о человеце некоем именем Паликарпе
Человек некий именем Паликарп порекло Добрыня, от веси нарицаемыя Малыя Соли, деревни Базина. Той убо Поликарп поведа нам о преславных чюдес Пресвятыя Владычицы нашея Богородицы и Присно Девы Марии, (л. 642) бываемая от пречистаго и чюдотворнаго Ея образа: мне убо, честнии отцы, по некоей вине случися слепота зла очима моима, и бе в той скорби стражда люто зело два лета, ниже рук своих зря, и бе совопрошаяся сродник своих вкупе же и сосед(е) [22] и ближних, они же совещаша о мне ов сице, а инии инако. Последи же приидох к некоей жене именем Марии, бе убо та вдовствующи 10 лет, и поведал ей вся приключьшаяся злая, вкупе же и совопрошахся, откуду бы улучити очима моима свет открыти. Она же благоразумна сущи, слыша от мене таковыя глаголы о приключьших ми ся таковых мне злых, совещевает ми благ совет: иди, рече, человече, и отпой понахиду по матери своей, и проси у нея прощения вкупе же и благословения; потом же иди в новопросвещенную обитель Пречистыя (л. 642об)Владычицы нашея честнаго и славнаго Ея Одигитрия, и великого чюдотворца Николу [23], и соверши тамо молебная у чюдотворнаго Ея и пречистаго образа, и великому чюдотворцу Николе, и никакож надежды погреши, но въскоре благодать и милость и исцеление получиши. Аз же слышах таковый совет и вся повеленная ею сотворих, и отпев понахиду по матери своей, и притекох ко гробницы матери моея, и плакахся гор’ко, просяще прощения о своих согрешении, купно же и благословения, бе бо по некоему навождению вражию имех крамолу к матери моей при смерти ея. По отпении же понафиднем матери моея мало время пребыв в дому своем, якоже никакож надежды погрешив, но вскоре от пречистаго и чюдотворнаго Ея образа совершенное здравие и прозрение очима моима получих; и от’идох в дом свой, (л. 643) радуяся, славя и благодаря Бога, и Пречистую Его Матерь Владычицу нашу Богородицу, и великого чюдотворца Николу.
Чюдо Пресвятыя Богородицы о жене Марии
Жена некая именем Мария Селиверъстова дщерь пореклом Сарлова, вдова сущи, от веси нарицаемыя Малыя Соли; сия убо Мария поведа нам сице: мне убо, честнии отцы, случися сицева немощь, яко огнем жегома люте, и от тоя зел’ныя болез’ни глава распухла, и мнети ми ся яко звон и лом во главе ми бысть, и от таковыя нестерпимыя болез’ни ниже сна мощи приимати, ниже лежати, ниже седети, и просто рещи, яко близ смерти; и слышах о преславных чюдесех, бываемых от чюдотворнаго и пречистаго образа Пресвятыя Владычицы нашея Богородицы, иже есть в новой пустыни, и обещание положих тамо молебная совершити, (л. 643об) и абие с великою нуждею ятся пути; нецыи же видяще мя покиваху главами своими, глаголюще ми: въскую толики долги пути тещи нудишися, уже бо в мертвых вменилъся еси; аз же слышах таковыя глаголюща ко мне и глагола к ним: случи ми ся аще и на пути умрети, не отпаду надежды спасения моего; егда же приидох в пречистую обитель Пресвятыя Владычицы нашея Богородицы, и со слезами пред чюдотворною иконою падох, просяще прощения о своих согрешении, купно же о исцелении, о преславное и неизреченное Пресвятыя Богородицы милосердие; никакож надежды не погреши, но вскоре исцеление получи милостию Пресвятыя Владычицы нашея Богородицы, и молением великого чюдотворца Николы; и соверши молебная и от’иде в дом свой, радуяся, славя и благодаря Бога Господа нашего Исуса Христа, и Пречистую Его Матерь Владычицу нашу Богородицу, и виликого [24] святителя и чюдотворца Николу.
(л. 644) Чюдо Пресвятыя Богородицы о жене Ирине
Жена некая именем Ирина Семионова дщерь, от веси нарицаемыя Борщина, и та вдова сущи; случися убо той Ирине по некоей вине немовати и не глаголати ничтож[е], токмо о нужных си рукою помовааше [25]; и приходит к чюдотворному образу Пресвятыя Владычицы нашея Богородицы, и припадает и молится со слезами, и молится [26]; и егда начаша пети молебная, и прииде время чести святое Евангелие, и тогда ей разверзеся язык, и нача глаголати ясно, милостию Господа Бога и Спаса нашего Исуса Христа, и Пречистыя Его Матери Пресвятыя Владычицы нашея Богородицы, и молением великого чюдотворца Николы, и от’иде в дом свой, радуяся, славя и благодаря Господа Бога и Спаса нашего Исуса Христа, и Пречистую Его Матерь Владычицу нашу Богородицу, и великого чюдотворца Николу.
Чюдо Пресвятыя Богородицы о человеке Панкратии и о жене его Матроне
(л. 644об) Человек некий именем Панкратий пореклом Деряба, художество имея лекарство, жена ж ему именем Матрона; по некоей убо вине сей Матроне случися ей внезапу слепота очима, яко в год вечера мало поболе очима, и мнящи яко естества болез’нь прииде, якож[е] убо и множицею случается человеком. По утрии ж воста, и абие ни висма [27] виде, горце убо болезнуя и стеняше о внезапном ослеплении своем, вкупе же воспоминая и согрешения своя, и пребысть убо не видя 15 недель. И слыша о преславных чюдесех Пресвятыя Владычицы нашея Богородицы, бываемых от пречистаго и чюдотворнаго Ея образа, иже есть в новой пустыни на реце Песошне; и обещевается молебная совершити Пресвятей Владычице нашей Богородице; Всемилостивая ж Пресвятая Владычица наша Богородица не презре сердечьнаго воздыхания ея, но на самый праздник праздникам (л. 645) и торжество торжеством, пречестнаго Рожества Господа Бога и Спаса нашего Исуса Христа, даде ей единому оку прозрение; таже преди реченный той муж Панкратий и с женою своею призывает в дом свой священника и совершают обещание свое, повелевают отпети молебен Господу Богу и Спасу нашему Исусу Христу, и Пречистей Его Матери, и преподобному чюдотворцу Макарию иже есть на реце Унже; и абие совершенное обема очима своима исцеление и прозрени[е] получает, милостию Господа Бога и Спаса нашего Исуса Христа, и Пречистыя Его Матере Пресвятыя Владычицы нашея Богородицы и Присно Девы Марии, и молением великого чюдотворца Николы и преподобнаго Макария Желтоводскаго чюдотворца; по некоем же времени и совершенно обещание свое исполняют, приходят убо в новую пустыню, в пречистую и святую обитель к чюдотворному образу (л. 645об) Пресвятыя Владычицы нашея Богородицы и Присно Девы Марии молебная совершити и обещание свое исполнити. Егда же прииде сей предиреченный Панкратий с женою своею во пречистую обитель, и молят настоя[те]ля тамо сущаго, дабы молебная отпел ко Пресвятей Владычице нашей Богородице и святому чюдотворцу Николе, и даша ему по силе помощи. Настоятель же отпев молебная Пресвятей Богородице и великому чюдотворцу Николе и отпусти их с миром, славя и хваля Бога, и Пречистую Его Матерь, и великого чюдотворца Николу. [28]
Еяже святыми молитвами всем нам отпущение грехов дарует Господь наш Исус Христос, и труждающимся в церковных или коих подвизех пособьствует, и мир даст, и здравие доволное и безмятежное рабом Своим промыслит, и от всех завидящих и ненавидящих и пакостящих сохраняет и утешает, (л. 646) даже и обитель сию святую и живущих в ней от всех видимых и невидимых врагов сохранит; се же ходатайством Преблагословенныя Владычицы нашея Богородицы и Присно Девы Марии, честнаго и славнаго Ея Одигитрия, молитвами же святителя и чюдотворца Николы, да сие житие тихо и безмятежно поживем и в будущем веце Царствия Небеснаго насладимъся, егоже буди всем нам получити благодатию Господа Бога и Спаса нашего Исуса [29] Христа, с Нимже копно [30] слава Отцу и Сыну и Святому Духу, ныне и присно и во веки веком. Аминь.
[По верхнему краю листов (лицевые и оборотные стороны) сделана надпись:
Глава 20 / Чюдеса / Пресвятыя / Богородицы / Иже есть / на Костроме / в новой / пустыни / на реце / Песошне / – далее надпись повторяется по листам циклически].